Йәшлегемә ҡайтҡым килә

Йәшлегемә ҡайтҡым килә

Теге иҫке клубҡа.

Шатлыҡ, ҡыуаныстан башым

Тейә яҙа болотҡа.

Унда иҙәндәр шығырҙай,

Марш уйындар, өсмөйөш...

Эргәләге баҡсаларҙа -

Сәскә атҡан муйылдар.

Егеттәрҙә кирза итек,

Кемдәлер ялтыр галуш.

Анау гармонист егете

Күңелемә килә хуш!

Алдарында тыпырлатам,

Һелкенә бөтә донъя

Әхирәтемә өндәшәм:

Йөрәгем яна, тыйма!

Йәй аҙағы, уңышлы көҙ,

Һаман уйындар бара.

Йоҡо туймауға сәбәп юҡ:

Совхозда урыу бара.

Күрше ауылдан килгәндәр

Егеттәр матай менеп.

Кейем-тәндәренә бөткән

Бензин еҫтәре һеңеп!

Ғашиҡ булған йәп-йәш саҡтар

Шулдыр йөрәк шашыуы.

Иртә таңдан көтә беҙҙе

Ҙур сөгөлдөр баҫыуы!

Көндөҙ эштә, яланда беҙ,

Кисен - тағы клубҡа.

Шатлыҡ-ҡыуаныстан баштар

Тейә яҙа болотҡа.

Ҡышҡы һыуыҡ, аяҡтарҙа

Төпләнгән, йылы быйма.

Клуб эсе умарталай,

Һелкенә бөтә донъя!

...Әхирәтемә өндәшәм:

Йөрәгем яна, тыйма!

Дилара Махмутдинова